Wah Nadi Jo Bah Sakti Thi

Har prem apni manzil tak nahin pahunchta. Kuch prem bas man ke bheetar ek nadi ki tarah bahte rahte hain.Wah Nadi Jo Bah Sakti Thi un anakhe bhavon, adhoore rishton aur maun ke un kshanon ki kahani hai, jahan shabd kam pad jaate hain, lekin man bahut kuch keh raha hota hai.Rahul Shukla ke samvedansheel nibandh prem, rishton, stri, smritiyon, apekshaon, doori aur aatmasamman ke un pahluon ko chhoote hain, jinhen hum apne rozmarra ke jeevan mein aksar mehsoos to karte hain, par kah nahin paate. Yahan rishte kisi bade haadse se nahin, balki chhoti-chhoti upekshaon se thakte hain; prem adhikar se nahin, samajh aur samman se jeevit rahta hai.Is pustak ki 'nadi' keval prem ka roopak nahin hai.

Woh har us manushya ke bheetar bahne wali samvedna hai, jismein prem karne, dene, muskurane aur jeevan ko seenchne ki poori kshamata thi-lekin paristhitiyon ne uske pravaah ko rok diya.Aur phir ek din woh nadi bahna band kar deti hai-isliye nahin ki usmein paani nahin bacha, balki isliye ki use apne astitva ki keemat samajh aa jaati hai.Yah pustak prem ki safalta ki nahin, uski sachchai ki kahani hai. Shayad isliye, iske pannon mein aapko kisi aur ki kahani padhte-padhte apni hi koi nadi dikhai de jaaye.