Vaikalpik Rajniti

Vaikalpik Rajneeti keval ek pustak nahin, balki ek prashn hai-kya rajneeti ka uddeshya keval satta praapt karna hai, ya samaj aur rashtra ka samagra vikas?

Aaj Bharat sahit duniya ke anek loktantron mein rajneeti ka kendra nagarik nahin, balki chunav, satta, dal aur prabandhan bante ja rahe hain. Parinaamswaroop aam nagarik loktantra ka swami nahin, balki ek darshak bankar rah gaya hai. Vikas ke daavon ke bawajood gareebi, asamaanata, bhrashtachar, saamajik vibhaajan, sansthaagat avishwas aur nagarik vimukhata jaisi samasyaen bani hui hain.

Yah pustak rajneeti ko ek naye drishtikon se dekhne ka prayas karti hai. Lekhak ka tark hai ki vartamaan satta-kendrit rajneeti ke sthaan par nagarik-kendrit, vikas-kendrit aur sahbhaagitaamoolak rajneeti ki aavashyakta hai. Pustak loktantra, vikas, nagarikta, shaasan, saamajik nyaay, vikendreekaran, paaradarshita aur uttaradaayitva jaise prashnon ki gahraai se padtaal karti hai tatha ek aise vaikalpik raajneetik model ki rooprekha prastut karti hai jismein aam avaam keval matdata nahin, balki vyavastha-nirmaata ki bhoomika mein ho.

Yah pustak kisi raajneetik dal, vichardhaara ya vyakti ke paksh ya vipaksh mein nahin, balki ek aise vimarsh ke paksh mein hai jo rajneeti ko satta ki pratiyogita se aage badhakar samaaj-nirmaan ka maadhyam banana chahta hai.

Yadi aap yah jaanana chahte hain ki rajneeti kaisi ho sakti hai, kaisi honi chahiye, aur nagarik uski disha kaise badal sakte hain-to yah pustak aapke liye hai।